தொடரும் விஸ்வரூபம்........

விஸ்வரூபம் தடைகளையும் பிரச்சினைகளையும் தாண்டி எதிர்பார்த்ததைவிட அதிக மகிழ்ச்சியையே கமலஹாசனுக்கு அளித்திருக்கிறது. மனிதர் இப்பொழுது மகிழ்ச்சி கடலில் மிதக்கிறார்.

ஆனால் அதனை தொடர்ந்து இப்பொழுது வித்தயாசமான வழக்குகள்  தொடரப்பட்டுக் கொண்டிருக்கிறது.

முதலில், தே.மு.தி.க கட்சித்தலைவர் விஜயகாந்த்  இந்தப்படம் ஜெய டி.வி. க்கு தரப்படாததினால் தான் இத்துணை தடைகள் என்று அம்மாவை நேரடியாகவே தாக்கினார். அதனால் அவர் மீது தமிழக முதல்வர் தன் "நற்பெயரு"க்கு களங்கம் ஏற்படுத்திவிட்டார் என்று வழக்கு தொடுத்திருக்கிறார்.

அடுத்ததாக என்.டி.டிவி, அம்மா, கமல், கலைஞர், ப.சி. போன்றோரை வைத்து கேலிச்சித்திரங்களை உண்டாக்கி அம்மாவை நக்கல் செய்தது. ஆதலால் அவர்கள் மீதும் தன் "நற்பெயரு"க்கு களங்கம் விளைவித்துவிட்டார்கள் என்று வழக்கு தொடர்ந்திருக்கிறார்.

இன்று கலைஞர் மீது வழக்கு தொடரப்பட்டிருக்கிறது. "பூனைக்குட்டி வெளிவந்து விட்டது" என்ற தலைப்பில் முரசொலியில் அம்மாவை ஏகத்துக்கும் புரட்டிப் போட்டிருந்தார். விக்ரம் படம் வெளிவந்த பொழுது அம்மா எம்.ஜி.ஆருக்கு எழுதிய கடிதத்தில் கமலஹாசனை ஒருமையில் திட்டியிருந்ததாக சொல்லி அதன் நகல் தன்னிடம் இருப்பதாகவும் எழுதியிருந்தார். ஆதலால் அவர் மீதும் தன் "நற்பெயரு"க்கு களங்கம் ஏற்படுத்திவிட்டார் என்று வழக்கு.

இதையெல்லாம் பார்க்கும் பொழுது நமக்கு ஒரு சந்தேகம் வருகிறது.

இந்த நற்பெயர் என்கிறார்களே, அப்படி என்றால் என்ன? அது எங்கிருக்கிறது? அது எங்கு கிடைக்கும்? எப்படி வாங்க வேண்டும்?

அந்த "வஸ்து"வை வாங்கிய பிறகு களங்கம் வராமல் எப்படி பாதுகாக்க வேண்டும்?

விவரம் தெரிந்தவர்கள் பின்னூட்டத்தில் போடுங்க, ப்ளீஸ்.

Follow @kummachi Tweet

Post Comment